𝗧𝗮𝘁𝗹𝗼𝗻𝗴 𝗦𝗮𝗸𝗼 𝗻𝗴 𝗧𝘂𝘆𝗼𝗻𝗴 𝗦𝗵𝗮𝗿𝗸 𝗙𝗶𝗻𝘀, 𝗡𝗮𝘀𝗮𝗯𝗮𝘁 𝘀𝗮 𝗣𝗼𝗿𝘁 𝗻𝗴 𝗧𝗮𝘆𝘁𝗮𝘆

𝗣𝗲𝗯𝗿𝗲𝗿𝗼 𝟭𝟳, 𝟮𝟬𝟮𝟲 | 𝗧𝗮𝘆𝘁𝗮𝘆, 𝗣𝗮𝗹𝗮𝘄𝗮𝗻 — Nasabat ng Palawan Council for Sustainable Development Staff – District Management Division North (PCSDS–DMD North), katuwang ang Philippine Coast Guard (PCG) at Municipal Agriculture Office (MAO) ng Taytay, ang tatlong sako ng kargamento ng pinatuyong shark fins sa pantalan ng Barangay Poblacion, Taytay.

Bandang alas-5 ng hapon ng Pebrero 17 nakatanggap ng ulat ang PCSDS hinggil sa umano’y wildlife shipment. Sa isinagawang inspeksyon, natagpuan ang dalawang (2) bahagyang bukas na sako at isa pang sako na ibinababa mula sa bangkang mula umano sa Cuyo, Palawan at pansamantalang dumaong sa Taytay. Ang tatlong sako ay naglalaman ng hinihinalang tuyong shark fins. Nabigong makapagpakita ng anumang kaukulang dokumento o permit ang mga sangkot sa pagdadala ng mga ito kaya agad na kinumpiska ang kargamento.

Sa imbentaryo, umabot sa kabuuang walong daan at walumpu’t pitong (887) piraso ng tuyong shark fins ang natuklasan sa loob ng tatlong sako. Sa tulong ng isang marine wildlife specialist ng Large Marine Vertebrates Research Institute Philippines (LAMAVE), nakumpirmang kabilang ang mga ito sa mga uri ng pating na nakalista bilang endangered species sa ilalim ng PCSD Resolution No. 23-967 at Appendix II ng Convention on International Trade in Endangered Species of Wild Fauna and Flora (CITES).

Bilang endangered species, tanging para sa lehitimong pananaliksik at regulated farming lamang maaaring payagan ang pag-aalaga o paggamit nito, at hindi para sa koleksyon at direktang komersyal na layunin—kabilang na ang pagkuha at pangangalakal ng mga by‑products gaya ng shark fins. Dahil dito, malinaw na hindi pinahihintulutan ang naturang kargamento sa ilalim ng Republic Act No. 9147 at mga kaugnay na regulasyon. Ang bangkang gagamitin sana sa pagbiyahe ay kasalukuyang nasa kustodiya ng MAO ng Taytay.

Ang mga nakumpiskang shark fins ay nasa pangangalaga ngayon ng PCSDS–DMD North at nakatakdang i-turnover sa Evidence Custodian para sa wastong disposisyon.

𝐓𝐀𝐍𝐃𝐀𝐀𝐍:

Pinapaalalahanan ng PCSDS ang publiko na ang pagkuha, pagdadala, pag-iimbak at pakikipagkalakalan ng mga threatened at endangered species at ng anumang bahagi ng mga ito ay mahigpit na ipinagbabawal. Hinihikayat ang lahat na agad ipagbigay-alam ang anumang impormasyon o kahina-hinalang gawain na may kinalaman sa buhay‑ilang at kapaligiran sa pamamagitan ng mga sumusunod na numero:

𝐏𝐂𝐒𝐃𝐒 𝐄𝐧𝐟𝐨𝐫𝐜𝐞𝐦𝐞𝐧𝐭 𝐓𝐞𝐚𝐦

Central – 09513208791

South – 09169546919

North – 09125753527

Calamian – 09076605619