𝗠𝗴𝗮 𝗕𝘂𝗵𝗮𝘆-𝗜𝗹𝗮𝗻𝗴 𝗮𝘁 𝗖𝗵𝗮𝗶𝗻𝘀𝗮𝘄, 𝗡𝗮𝗸𝘂𝗺𝗽𝗶𝘀𝗸𝗮 𝘀𝗮 𝗢𝗽𝗲𝗿𝗮𝘀𝘆𝗼𝗻 𝘀𝗮 𝗧𝗶𝗺𝗼𝗴 𝗣𝗮𝗹𝗮𝘄𝗮𝗻

𝗣𝗲𝗯𝗿𝗲𝗿𝗼 𝟭𝟮–𝟭𝟯, 𝟮𝟬𝟮𝟲 | 𝗦𝗼𝘂𝘁𝗵𝗲𝗿𝗻 𝗣𝗮𝗹𝗮𝘄𝗮𝗻 — Ilang wildlife at dalawang (2) chainsaw unit ang nakumpiska sa isinagawang dalawang araw na enforcement at patrolling operation ng PCSDS Enforcement South Team at Special Operations Team katuwang ang Peace and Security Cluster, Western Naval Command, at 2MSOU PNP-MG.

Noong Pebrero 12, isang (1) Palawan Hill Mynah ang boluntaryong naiturnover sa Brgy. Malatgao, Quezon. Sa Brgy. Bunog, Rizal, isang Reticulated Python ang isinuko sa mga awtoridad. Nang sukatin, natuklasang patay na ito at tinatayang may habang 12.2 talampakan at bigat na 16 kilo bago maayos na inilibing. Sa pamilihan ng Brgy. Punta Baja, Rizal, nakumpiska rin ang dalawang (2) Palawan Hill Mynah at isang (1) Philippine Long-tailed Macaque.

Noong Pebrero 13, habang nagpapatrolya mula Rizal patungong Bataraza, dalawang (2) chainsaw ang nakumpiska sa magkahiwalay na barangay matapos mabigong magpakita ng kaukulang permit ang mga may-ari, alinsunod sa Republic Act No. 9175 o “Chainsaw Act of 2002.” Sa pagbabalik ng team, naitala pa ang turnover ng isang (1) Palawan Hill Mynah sa Rizal at dalawang (2) Philippine Long-tailed Macaque sa Quezon at Narra.

Ang lahat ng buhay‑ilang ay ligtas na naiturnover sa Palawan Wildlife Rescue and Conservation Center (PWRCC) para sa wastong pangangalaga at rehabilitasyon, habang ang mga nakumpiskang chainsaw ay isinailalim sa kinakailangang dokumentasyon at tamang proseso.

Binibigyang-diin ng PCSDS at mga katuwang na ahensya na mahalaga ang pakikiisa ng komunidad sa pag-turnover ng wildlife at sa pagsunod sa batas sa paggamit ng chainsaw, upang maprotektahan ang kagubatan at natatanging likas-yaman ng Palawan.

𝗧𝗔𝗡𝗗𝗔𝗔𝗡: Ang mga buhay-ilang ay nararapat manatili sa kanilang natural na tirahan. Hinihikayat ang publiko na agad i-report o i-turnover sa mga awtoridad ang anumang wildlife o kahina-hinalang paggamit ng chainsaw. Para sa agarang ulat at koordinasyon, makipag-ugnayan sa:

𝐏𝐂𝐒𝐃𝐒 𝐄𝐧𝐟𝐨𝐫𝐜𝐞𝐦𝐞𝐧𝐭 𝐓𝐞𝐚𝐦

Central – 09513208791

South – 09169546919

North – 09125753527

Calamian – 09076605619