𝐈𝐬𝐚𝐧𝐠 ‘𝐂𝐫𝐢𝐭𝐢𝐜𝐚𝐥𝐥𝐲 𝐄𝐧𝐝𝐚𝐧𝐠𝐞𝐫𝐞𝐝 𝐒𝐩𝐞𝐜𝐢𝐞𝐬’ 𝐧𝐚 𝐏𝐚𝐥𝐚𝐰𝐚𝐧 𝐇𝐢𝐥𝐥 𝐌𝐲𝐧𝐚𝐡, 𝐢𝐧𝐢𝐥𝐢𝐠𝐭𝐚𝐬 𝐧𝐠 𝐜𝐨𝐧𝐜𝐞𝐫𝐧𝐞𝐝 𝐜𝐢𝐭𝐢𝐳𝐞𝐧 𝐩𝐚𝐭𝐮𝐧𝐠𝐨𝐧𝐠 𝐊𝐚𝐰𝐚𝐧𝐢𝐡𝐚𝐧 𝐧𝐠 𝐒𝐚𝐧𝐠𝐠𝐮𝐧𝐢𝐚𝐧𝐠 𝐏𝐚𝐥𝐚𝐰𝐚𝐧 𝐩𝐚𝐫𝐚 𝐬𝐚 𝐏𝐚𝐭𝐮𝐥𝐨𝐲 𝐧𝐚 𝐏𝐚𝐠-𝐮𝐧𝐥𝐚𝐝 (𝐏𝐂𝐒𝐃𝐒)

Hapon ng ika-4 ng Disyembre nang matagpuan ng mga residente ng Brgy. San Jose, Lungsod Puerto Princesa, ang isang Palawan Hill Mynah o Kiyaw sa damuhan. Basang-basa umano ang pakpak nito dahil na rin sa bumugsong ulan noong mga oras na iyon, kaya maaaring nahirapan itong makalipad.

Huwebes ng umaga nang dalhin ni G. Arvin Carl F. Lusoc ang naturang buhay-ilang sa PCSDS. Ayon kay G. Lusoc, mga pamangkin niya ang unang nakakita sa Kiyaw at boarders nila ang sumaklolo rito. Mayroon din siyang kamalayan na kaunti na lamang ang bilang nito sa lalawigan ng Palawan, kaya agad niya itong dinala sa Kagawaran ng Kapaligiran at Likas na Yaman (DENR), at mula roon ay ginabayan siya patungo sa tamang ahensiya–PCSDS.

Ang Palawan Hill Mynah ay kabilang sa listahan ng ‘Critically Endangered Species’ o mga buhay-ilang na malapit nang maubos ayon sa PCSD Resolution No. 23-967. Kaya hinihikayat ng PCSDS ang lahat ng Palaweño na makipagtulungan sa pagliligtas ng mga buhay-ilang, anumang klase at uri.

Sakaling may matagpuang buhay-ilang na nasa delikadong sitwasyon, huwag mag-atubiling dalhin ito sa PCSDS, o kaya naman ay makipag-ugnayan sa Wildlife Rescue Team sa numerong 0931 964 2128 / 0965 662 0248, at maaari ding magpadala ng mensahe sa Facebook Page ng PCSD para sa agaran at tamang aksiyon.