𝐁𝐚𝐥𝐢𝐧𝐭𝐨𝐧𝐠 𝐧𝐚 𝐍𝐚𝐭𝐚𝐠𝐩𝐮𝐚𝐧 𝐬𝐚 𝐂𝐚𝐯𝐢𝐭𝐞, 𝐌𝐮𝐥𝐢𝐧𝐠 𝐍𝐚𝐢𝐛𝐚𝐥𝐢𝐤 𝐬𝐚 𝐏𝐚𝐥𝐚𝐰𝐚𝐧

𝗦𝗲𝘁𝘆𝗲𝗺𝗯𝗿𝗲 𝟭𝟳, 𝟮𝟬𝟮𝟲 | 𝗣𝘂𝗲𝗿𝘁𝗼 𝗣𝗿𝗶𝗻𝗰𝗲𝘀𝗮 𝗖𝗶𝘁𝘆, 𝗣𝗮𝗹𝗮𝘄𝗮𝗻 — Isang Palawan Pangolin (𝘔𝘢𝘯𝘪𝘴 𝘤𝘶𝘭𝘪𝘰𝘯𝘦𝘯𝘴𝘪𝘴), o “Balintong”, na unang natagpuan sa isang residential property sa Mendez, Cavite, ang matagumpay na naibalik sa Palawan at muling pinakawalan sa natural nitong tirahan.

Bandang alas 6:18 ng umaga nang tanggapin ng PCSDS Wildlife Rescue Team ang isang buhay na lalaking balintong sa Puerto Princesa International Airport.

Ayon sa ulat, natagpuan umano ito na gumagala sa loob ng isang residential property sa Cavite. Sa tulong ng DENR-Biodiversity Management Bureau (DENR-BMB) CALABARZON, naibalik ito sa Palawan para sa tamang pagsusuri at disposisyon.

Agad na isinagawa ang pagsusuri sa kondisyon nito kasama si Dr. Glenn Rebong. Napag-alamang alerto ito, malusog, at maaari nang pakawalan sa parehong araw.

Matapos ang kinakailangang paghahanda at koordinasyon sa mga katuwang na tanggapan, matagumpay na naibalik sa natural na tirahan ang balintong bandang alas-11:45 ng umaga.

Ang matagumpay na pagbabalik sa Palawan at pagpapalaya sa balintong ay naging posible sa pamamagitan ng koordinasyon ng PCSDS Wildlife Rescue Team, DENR-BMB CALABARZON, at mga katuwang na tanggapan na tumulong sa ligtas na paghawak at pag-dispose ng wildlife.

Ang Palawan Pangolin ay kabilang sa mga Critically Endangered species sa ilalim ng PCSD Resolution No. 23-967. Matatagpuan lamang ito sa Palawan at nangangailangan ng patuloy na pangangalaga at proteksyon.

𝐓𝐀𝐍𝐃𝐀𝐀𝐍:

Hinihikayat ang publiko na huwag hulihin, alagaan, o ilipat ang mga wildlife mula sa kanilang natural na tirahan. Kung may matagpuang wildlife na nangangailangan ng tulong, agad itong i-report o i-turnover sa mga kinauukulang awtoridad upang mabigyan ng tamang pangangalaga at disposisyon.

𝐏𝐂𝐒𝐃𝐒 𝐄𝐧𝐟𝐨𝐫𝐜𝐞𝐦𝐞𝐧𝐭 𝐓𝐞𝐚𝐦

Smart / Sun: 09319642128

Globe: 09169646919

Landline: 048 – 726-6627